Հայաստանի ժողովուրդը հաջողությամբ ավարտեց կարևորագույն ընտրություններ, որոնք, ըստ Եվրոպական խորհրդարանի, ոչ միայն որոշում են Հայաստանի ապագան, այլև ունեն իրենց ազդեցությունը Հարավային Կովկասի տարածաշրջանի վրա։ Այս մասին հայտարարություն է տարածվել Եվրոպական խորհրդարանի մի խումբ պատգամավորների կողմից՝ երկրում անցկացված ընտրությունների առնչությամբ։
Հայտարարությանը ստորագրել են Եվրոպական խորհրդարանի արտաքին հարաբերությունների հանձնաժողովի նախագահ Դեյվիդ Մքալիսթերը, Եվրանեսթ խորհրդարանական վեհաժողովում պատվիրակության նախագահ Սերգեյ Լագոդինսկուն, Եվրոպական խորհրդարանի Հարավային Կովկասի հետ կապերի պատվիրակության նախագահ Նիլա Ուշակովան, Հարավային Կովկասի հետ կապերի պատվիրակության փոխնախագահ և Եվրոպական խորհրդարանի ընտրությունների դիտարկման պատվիրակության ղեկավար Նատալի Լուազոն, Եվրոպական խորհրդարանի արտաքին հարաբերությունների հանձնաժողովի Հայաստանի հարցերով մշտական զեկուցող Միրիամ Լեքսմանը և Եվրախորհրդարանի ժողովրդավարության աջակցության և Հայաստանում ընտրությունների համակարգման խմբի ղեկավար Նաչո Սանչես Ամորան։
Մենք շնորհավորում ենք հայ ժողովրդին՝ իրենց ժողովրդավարական իրավունքներն իրացնելու և ինքնիշխան կամքը խաղաղ ու կազմակերպված միջավայրում արտահայտելու կապակցությամբ։ Ընտրություններին բարձր մասնակցությունը աճող քաղաքացիական ակտիվության դրական և հուսադրող նշան է։
Մեր պատվիրակությունը դրական է գնահատել ընտրական գործընթացը՝ որպես լավ կազմակերպված և ընտրողներին տվող իրական քաղաքական այլընտրանքներ։
Հայտարարության մեջ հստակ քննադատվում է Ռուսաստանի Դաշնության վարած քաղաքականությունը։ Ռուսաստանը հերթական անգամ ցույց է տվել այն երկրների ինքնիշխանության նկատմամբ հարգանքի բացակայությունը, որտեղ ձգտում է գերիշխել։ Ընդգծվում է, որ Ռուսաստանի կողմից հայ ընտրողներին ստիպելու փորձերը՝ տնտեսական սպառնալիքների և մանիպուլյատիվ բովանդակության միջոցով, մեծ մասամբ ձախողվել են։
Մենք հավաստիացնում ենք, որ Եվրոպական միությունը շարունակելու է աջակցել Հայաստանին՝ դիմակայելու Ռուսաստանի ճնշմանը և թույլ տալու քաղաքացիներին ազատ ընտրություն։
Եվրախորհրդարանը կոչ է անում հետագա և ավելի մասշտաբային միջոցներ ձեռնարկել Հայաստանի կայունության ամրապնդման ուղղությամբ։ Մասնավորապես, անհրաժեշտ է աջակցել երկրի տնտեսության դիվերսիֆիկացմանը և նպաստել ԵՄ-Հայաստան առևտրին՝ օրինակ՝ ԵՄ-ի ինքնավար առևտրային միջոցների ընդունման միջոցով։ Կարևոր է նաև վիզային ռեժիմի ազատականացման և ԵՄ գործընկերության նոր առաքելության շուտափույթ ծավալումը։
Մենք հավատում ենք, որ ընտրությունների արդյունքները մատնանշում են Հայաստանի կողմից խաղաղության, տարածաշրջանային համագործակցության, տարածաշրջանային փոխկապակցվածության և Եվրոպական միության հետ ավելի սերտ կապերի ընտրությունը։ Անհամբերությամբ սպասում ենք Հայաստանի նորընտիր Ազգային ժողովի և նոր կառավարության հետ աշխատանքների մեկնարկին՝ այդ ճանապարհին հետագա առաջընթացին աջակցելու և հայ ժողովրդի բարգավաճումն ապահովելու համար։