Հայաստանի առողջապահության նախարարությունը Հեմոֆիլիայի համաշխարհային ֆեդերացիայի հետ համատեղ մշակած կարևորագույն բանաձևը ստացել է միջազգային ճանաչում։ «Գլոբալ գործողություններ՝ հեմոֆիլիայով և արյան մակարդելիության այլ խանգարումներով անձանց բուժման հավասար հասանելիության ապահովման համար» անվանվող այս փաստաթուղթը միաձայն ընդունվել է Առողջապահության համաշխարհային կազմակերպության (ԱՀԿ) բոլոր 194 անդամ պետությունների կողմից։
Այս հաջողության մասին հայտնի դարձավ Ժնևում ընթացող ԱՀԿ 79-րդ նստաշրջանի ընթացքում։ Ընդունված բանաձևը հիմք է դառնում գլոբալ և համակարգված հարթակի ստեղծմանը, որի նպատակն է ապահովել հեմոֆիլիայով և արյան մակարդելիության այլ խանգարումներով տառապող մարդկանց բուժման և անհրաժեշտ խնամքի հասանելիությունը ողջ աշխարհում։
ՀՀ առողջապահության փոխնախարար Լենա Նանուշյանը նշել է, որ հաջորդ քայլը բանաձևի դրույթների կյանքի կոչելն է։ Այս գործընթացը կիրականացվի 2026-2028 թվականների համար մշակված ճանապարհային քարտեզի հիման վրա։