Հայաստանի արտգործնախարար Արարատ Միրզոյանը մայիսի 26-ին Երևանում կայացած մամուլի ասուլիսի ընթացքում նշել է, որ գերիների և պահվող անձանց հարցը մշտապես Հայաստանի իշխանությունների քննարկումների կենտրոնում է։
«Եթե անհրաժեշտություն կա ամեն անգամ լսել այդ հավաստիացումը, ես պատրաստ եմ դա կրկնել ևս հազար անգամ։ Այս թեման, հարցնում եք այդ մասին, թե ոչ, իսկ երբեմն էլ գերիների հարազատները այն բարձրացնում են հասկանալի անհանգստությամբ ու տագնապով, այս հարցը մշտապես առկա է մեր երկխոսության մեջ», – նշել է նախարարը։
Միրզոյանը նաև հավելել է, որ այս հարցում միակ իսկապես հաջողությունը համարվում է նոր գերիների ազատ արձակումը։ «Քանի դեռ նման հաջողություն չկա, քննարկումների արժեքն էլ հարցականի տակ է», – ասել է նա։
Նախարարը նաև նշել է, որ ԱՄՆ-ի հետ հարաբերությունների շրջանակում այս հարցը միշտ բարձրակարգության է ունեցել։ «Անկեղծ ասած՝ ես լիազորված չեմ խոսել ամերիկյան կողմի անունից, բայց կարծում եմ, կարող եմ պնդել, որ մեր ամերիկացի գործընկերներն էլ իսկապես միշտ անկեղծ հետաքրքրություն են ցուցաբերում այդ հարցի նկատմամբ, ջանքեր են գործադրում, և մենք հիշում ենք անցյալում տեղի ունեցած դեպքերը, երբ այդ ջանքերը հաջողությամբ են պսակվել։ Ես մեծ հույս ունեմ, որ ապագայում այս հարցով իսկապես կհաջողվի կրկին որոշակի, այսպես ասած, հաջողության հասնել», – ավելացրել է նախարարը։
Հիշեցնենք, որ ադրբեջանական բանտերում պահվող հայ ռազմագերիների և պատանդների ստույգ թիվը մինչ օրս հայտնի չէ։ Փորձագետների գնահատմամբ՝ նրանք մի քանի հարյուր են։ Ադրբեջանի իշխանությունները հաստատում են իրենց մոտ 19 հայերի առկայությունը։
Ադրբեջանական գերության մեջ պահվող անձանց թվում են նաև Արցախի ռազմաքաղաքական ղեկավարության նախկին և գործող 8 ներկայացուցիչներ․ Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, խորհրդարանի խոսնակ Դավիթ Իշխանյանը, Արցախի Պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը։
Բաքվի խամաճիկային դատարանը շինծու մեղադրանքներով ցմահ ազատազրկման է դատապարտել Արայիկ Հարությունյանին, Դավիթ Բաբայանին, Դավիթ Իշխանյանին, Դավիթ Մանուկյանին, Լևոն Մնացականյանին, իսկ Բակո Սահակյանին և Արկադի Ղուկասյանին և Ռուբեն Վարդանյանին՝ 20 տարվա ազատազրկման։ Մնացած արցախցիներին, այսպես կոչված, դատարանը դատապարտել է մինչև 15 տարվա ազատազրկման։