«Բարգավաճ Հայաստան» կուսակցությունը (ԲՀԿ) խստորեն դատապարտում է բռնության ցանկացած կոչ, հակասահմանադրական գործողություն կամ դրսևորում, այդ թվում՝ արցախցիների նկատմամբ։ Այս մասին հայտնել է «Բարգավաճ Հայաստան» կուսակցության առաջնորդ Գագիկ Ծառուկյանի մամուլի քարտուղար Իվետա Տոնոյանը՝ արձագանքելով դիմակավորված անձանց մասնակցությամբ սկանդալային տեսանյութին, որտեղ իբրև արցախյան բարբառով սպառնում են Հայաստանի վարչապետ Նիկոլ Փաշինյանին։
Իմ կարծիքով, նման երևույթներն անընդունելի են։ Իրավապահ մարմիններին կոչ եմ անում հնարավորինս սեղմ ժամկետներում բացահայտել բոլոր հանգամանքները և մեղավորներին ենթարկել պատասխանատվության։
«Իրավապահ համակարգը, եթե ցանկանա, կարող է դա անել, քանի որ տնօրինում է բոլոր անհրաժեշտ ռեսուրսներն ու գործիքները։ Ավելին, կարևոր է փարատել հանրության շրջանում տարածվող այն կասկածները, թե տեսանյութի տարածման հետևում կարող են կանգնած լինել կառավարական շրջանակները։ Միևնույն ժամանակ, համոզված ենք, որ ցանկացած տեսանյութ, անկախ դրա բովանդակությունից, չի կարող և չպետք է առիթ դառնա հակաարցախյան քարոզչության, ներհասարակական թշնամանքի կամ ատելության համար, հատկապես՝ գործող իշխանությունների կողմից»,- նշել եմ իմ հրապարակման մեջ։
Այս իրավիճակում հայ ժողովուրդն այսօր, ինչպես երբեք, ունի ներքին համերաշխության և պատասխանատու հանրային երկխոսության կարիք։
Ավելի վաղ իշխանամետ լրատվամիջոցները տարածել էին մի տեսանյութ, որտեղ զենքով զինված անհայտ անձինք արցախյան բարբառով սպառնում են Հայաստանի վարչապետ Նիկոլ Փաշինյանին և ՀՀ քաղաքացիներին կոչ անում խորհրդարանական ընտրություններում չքվեարկել նրա օգտին։ ՀՀ Քննչական կոմիտեում փաստի առթիվ նախաձեռնվել է քրեական վարույթ։