Հայաստանում հարցվածների մոտ մեկ երրորդը կընտրեր «Քաղաքացիական պայմանագիր» կուսակցությունը

Հայաստանում հարցվածների մոտ մեկ երրորդը, կամ 28,8%-ը, իր ձայնը կտար Նիկոլ Փաշինյանի գլխավորած «Քաղաքացիական պայմանագիր» կուսակցությանը, եթե ընտրություններն անցկացվեին առաջիկա հանգստյան օրը։ Այս տվյալները հրապարակվել են MPG խորհրդատվական ընկերության կողմից իրականացված «ՀակաՍնկային» խորագրով հարցման արդյունքների համաձայն։

Հարցվածներից 14,9%-ը նշել է, որ կընտրի գործարար Սամվել Կարապետյանի «Ուժեղ Հայաստան» դաշինքը, իսկ 12,1%-ը՝ ՀՀ երկրորդ նախագահ Ռոբերտ Քոչարյանի «Հայաստան» դաշինքը։ Գործարար Գագիկ Ծառուկյանի «Բարգավաճ Հայաստան» կուսակցությանը կողմնակցում են հարցվածների 8,7%-ը, իսկ նախկին օմբուդսմեն Արման Թաթոյանի «Միասնության թևեր» կուսակցությանը՝ 5,8%-ը։ Քաղաքական դաշտի մնացած ներկայացուցիչները չեն հավաքել անցողիկ 4 տոկոսի շեմը։

Հարցման ընթացքում 8,6 տոկոսը հրաժարվել է պատասխանել հարցին, իսկ 3,4 տոկոսը դժվարացել է իր նախընտրությունները հստակեցնել։

Հարցվածների մեծ մասը, 59,3%-ը, միանշանակ պատասխանել է, որ կմասնակցի հունիսի խորհրդարանական ընտրություններին։ 14 տոկոսը նշել է, որ, ավելի շուտ, կգնա ընտրություններին, իսկ 11,4%-ը՝ ավելի շուտ, չի գնա։ 8,3 տոկոսը միանշանակ հայտնել է, որ չի մասնակցի ընտրություններին, իսկ 7 տոկոսը դժվարացել է պատասխանել։

Հետաքրքրական է, որ ապրիլին անցկացված նմանատիպ հարցման ժամանակ միանշանակ դրական պատասխան տվել էր հարցվածների 51,9%-ը։

Հարցումն իրականացվել է հեռախոսազանգերի միջոցով՝ մայիսի 19-21-ն ընկած ժամանակահատվածում։ Ընտրանքի ծավալը կազմել է 1102 մարդ, իսկ ընտրանքի շեղումը՝ + / – 3 տոկոս։

MPG-ն 2011 թվականից աշխատում է որպես աշխարհում հասարակական կարծիքի ուսումնասիրման ամենահեղինակավոր կազմակերպություններից մեկի՝ Gallup միջազգային ասոցիացիայի պաշտոնական ներկայացուցիչ Հայաստանում։ Ընկերությունը սոցիոլոգիական և մարքեթինգային հետազոտությունների շուկայում իրականացրել է ավելի քան 800 նախագիծ։