Հայոց ցեղասպանության 111-րդ տարելիցի կապակցությամբ Կիպրոսի արտաքին գործերի նախարարությունը (ԱԳՆ) համերաշխություն է հայտնել հայ ժողովրդին։ Այս մասին նախարարությունը հայտնել է իր X (նախկինում՝ Twitter) հաշվին։
Հաղորդագրության մեջ նշվում է․ «Հայոց ցեղասպանության զոհերի հիշատակի օրը մենք հիշում ենք սուրբ նահատակներին և երդվում ենք սրբորեն հարգել նրանց հիշատակը»։
Հիշեցնենք, որ Օսմանյան կայսրությունում Հայոց ցեղասպանությունը 20-րդ դարի առաջին ցեղասպանությունն էր։ 1915 թվականի ապրիլի 24-ին Օսմանյան կայսրության մայրաքաղաք Կոստանդնուպոլսում սկիզբ դրվեց կայսրության հայ հպատակների ոչնչացմանը, որը սկսվեց հայ մտավորականների՝ գրողների, բանաստեղծների, ճարտարապետների և խորհրդարանականների ձերբակալություններով, իսկ հետո վերածվեց հայերի լիակատար բնաջնջման։ Թուրքական իշխանությունների այս գործողությունների արդյունքում ավելի քան 1,5 միլիոն հայեր տեղահանվեցին, սովից ու խոշտանգումներից մահացան։
Հայոց ցեղասպանությունը ճանաչել են Եվրոպայի խորհուրդը, Եվրախորհրդարանը, ՄԱԿ-ի խտրականության կանխարգելման և փոքրամասնությունների պաշտպանության ենթահանձնաժողովը, Եկեղեցիների համաշխարհային խորհուրդը և աշխարհի բազմաթիվ երկրներ։ Առաջինը հայերի զանգվածային սպանությունները պաշտոնապես ճանաչել և դատապարտել է Ուրուգվայի խորհրդարանը (1965)։
Այս ցեղասպանությունը ճանաչվել է նաև Ավստրիայի, Արգենտինայի, Բելգիայի, Բուլղարիայի, Բոլիվիայի, Բրազիլիայի, Վատիկանի, Վենեսուելայի, Գերմանիայի, Հունաստանի, Իտալիայի, Կանադայի, Կիպրոսի, Լատվիայի, Լիբանանի, Լիբիայի, Լիտվայի, Լյուքսեմբուրգի, Նիդերլանդների, Պարագվայի, Լեհաստանի, Պորտուգալիայի, Ռուսաստանի, Սիրիայի, Սլովակիայի, ԱՄՆ-ի, Ֆրանսիայի, Չեխիայի, Չիլիի, Շվեյցարիայի և Շվեդիայի կողմից։
Թուրքիան շարունակում է մարդկության դեմ այդ հանցագործության ժխտման քաղաքականությունը։ Ամեն տարի այդ օրը Հայաստանում և Սփյուռքում անցկացվում են Հայոց ցեղասպանության զոհերի հիշատակին նվիրված միջոցառումներ։